8.21.2019

Heimafriður ein rættur, sum ikki er vunnin enn.

Okkara stórsta inntøkukelda er ótolandi fyri nøkur teirra, ið búgva nærhendis ljóð- og roykdálkandi skipum.

- Felagið heimafriður hevur gjørt vart við hettar í longri tíð, og enn er einki gjørt, uttan at summi reiðaríir hava víst atlit, sýnt
samfelagssinni, og hava bøtt um ljóðdálkingina eitt nú við at ljóðbjálvað motorin.
Felagið skipaði fyri góðum og kunnandi kjakfundi í Dansifrøi í gjárakvøldi, har ymsar loysnir vóru viðgjørdar. Sum limur í vinnunevndini í Tórshavnar kommunu, fyllir hettar málið sera nógv, tí ein loysn má finnast, sum kommurnar megna at fíggja, sum er rættvís fyri vinnuna, sum kann lata seg gera hjá SEV og sum loysir ljóð- & roykdálkingina hjá borgunum.

Vinnan tekur ikki atlit til borgaran, umhvørvið ella manningina umborð, tá skipini larma og dálka. Kommunurnar eru í kapping sínamillum um skipini, og vilja sjálvsagt verja sítt kappingarføri, tí kunna tær ikki av sínum eintingum seta hægri krøv enn hinar kommunurnar. Einasta loysnin er, at landið má traðka til, og áseta somu mørk fyri dálking við kunngerð fyri allar kommunurnar.

Tíverri er tað so, at ikki øll í vinnuni av sínum eintingum vísa atlit og taka ábyrgd - Við eingin krøv at seta, verða tað tey í vinnuni, ið veruliga taka ábyrgd og gera íløgur í betrandi tiltøkum ella umhvørvisbetri skipum, sum missa kappingarføri mótvegis teimum, ið dálka og larma. Tí má landið seta ein standard.

Rættin til frið í egnum heimi, er minsta krav borgarans, sum vit í Javnaðarflokkinum vilja arbeiða fyri.

Bjørg Dam
Valevnið Javnaðarfloksins

No comments:

Post a Comment