Froskmannafelagið hevur tikið stig til eitt sera spennandi havfrítíðarumhvørvið við spælilandi úti í Bakka, við vátdraktum, snorkliútgerð, kajakkum, segljollum og havsvimjing. Bátafelagið, kajakkfelagið, Teinaringurin og Surfarnir eru eisini partur av verkætlanini, og er endamálið, at øll feløg, ið hava við havið at gera, kunna verða við.
Eisini fáa frítíðarskúlar, skúlar, barnagarðar, Margarinfabrikkin, skótar og onnur feløg møguleikan at sleppa at spæla, svimja, snorkla, sigla o.a.
Umframt at verða eitt frítíðarítriv, eru froskmennirnar eisini partur av tilbúgvingini og hjálpa við leiting. Spæl á sjónum gevur týdningarmiklar royndir at klára seg, um vanlukka hendir. Eisini tí, síggi eg eina alment gagnliga verkætlan, har børn og vaksin í kommununi ikki einans fáa møguleikan at røra seg og hugna sær saman, men eisini at klára seg á sjónum.
Tað gleddi meg sera nógv, at síggja eldru næmingarnir úr Gula skúla, sum í 3 vikur hava verið í starvsvenjing. Teir hava saman við læraranum Birgir Sondum verið við at umvæla bæði neystini úti í Bakka, og hava fingið eina uppliving fyri lívið og ognarskap í hesi samansjóvandi verkætlanini.
Eldsálin Elith vísti mær runt og greiddi hjartaliga frá framtíðarætlaninum, sum saman við øðrum góðum fólkum, ið geva sítt íkast til verkætlanina, byggja upp eitt satt havparadís í hjartanum í Tórshavn.
Sum eg síggi, so hevur hendan verkætlanin sera stórt alment gagn, er sosial og fer at skapa lív, tilvit og eitt havumhvørvið úti í Bakka, sum vit øll kunnu gleða okkum til.
Í okkara familju, hava vit fingið sera nógvar góðar upplivingar á sjónum, tí ynski eg øllum, at fáa møguleikan til tess Limagjaldið er einans 150 kr um árið, so øll hava møguleika at verða við.
Á flaggdegnum 25.apríl er ætlanin at neystini eru klár.
Myndin nr 1 er lænt frá Jógvan Á Dul