 |
| Íverksetarahúsið HUGSKOTIÐ |
Kommunan eggjar til grønari íverksetan
Kommunan hevur eina góða skipan í UMHVØRVISSTUÐULINUM, sum við at lata stuðul til grøna íverksetan eggjar íverksetarar at hugsa grønt. Eisini hevur kommunan við Íverksetarahúsinum bøtt munandi um umstøðurnar hjá íverksetarum sum heild í kommununi. Tvey sera gagnlig og virðisskapandi átøk.Eg ynski at kommunan í enn størri mun, kann eggja til grøna íverkseting, við at byggja uppá verandi skipanir.
Tað liggur ein stór ábyrgd hjá kommunum og landi, tá tað umræður hugburðsbroytingar til umhvørvið. Initiativið liggur tí hjá tí almenna, tí umhvørvisátøk ofta krevja eina tillaging í gerandisdegnum hjá fólkum og tey geva eitt størri samfelags- og umhvørvisyvirskot heldur enn tað stóra avlopið á fíggjaryvirlitinum hjá vinnuni.
At skapa eina hugburðsbroyting millum fólk og íverksetarar ger, at vinnan fer at kunna fáa fyrimunir av, at taka við umhvørvisátøkum. Tað síggja vit, eitt nú við at fyritøkur brúka umhvørvið beinleiðis í teirra marknaðarføring. Hettar gera nakrar fyritøkur longu, men vit skula arbeiða fyri, at nógv fleiri velja ta grønu leiðina, tí tað skal loysa seg.
Grøna hugburðsbroytingin sum skal til í Tórshavnar kommunu krevur, at eitt fólk við stórum grønum hjarta fær umhvørvismál.
Grøn vinna: lokal framleiðsla og endurnýtsla
Grøn vinna er vegurin fram. Fyrimunurin við eitt nú endurnýtslu og lokalari framleiðslu er, at tað skapar nógvar jaligar ringvirkningar í lokalsamfelagnum og minkar um útlátum, ið standast av flutninginum av vøru úr fjarskotnum londum.Vit hava nógvar góðar íverksetar, ið gagnnýta okkara serstaka tilfeingi.
Matvinnan blómar og eitt nú Kirkjubøgarðurin gongur fremstur við at virðisøkja kjøtið og borðreiða í serligu hugnaligu og søguligu kørmunum í roykstovuni. Norðlýsið og tónleikavinnan nýta m.a. grottur sum katedralar at hava konsertir í. Klintring í okkara brøttu homrum og fuglabjørgum er væl á veg, at blíva okkara næsta ferðafólkaattraksjónin?Íverksetarar skapa grundarlag fyri stórum búskaparligum vøksti í londum kring okkum, tí leggja bæði lond og kommunur seg eftir, at skapa so góðar karmar og grundarlag fyri íverksetarar og vinnu, sum til ber.
Umhvørvið skula vit at verna um, tí skal kommunan hugsa nógv meir grønt - eisini tá kemur til grøna íverksetan og vinnu.
