Eg fegnist stórliga um, at býráðið 12.9.2016 samtykti umhvørvispolitikkin fyri Tórshavnar kommunu. Nú er fyrsta stóra takið tikið til eina grøna kommunu, vit øll kunnu verða stolt av.
Fyri at politikkurin ikki skal enda í einari skuffu, er tað sera týdningarmikið at ein eldhuga grøn sál kemur í býráðið at fremja umhvørvispolitikkin í verki.
Soleiðis stendur at lesa á torshavn.fo:
"Umhvørvispolitikkurrn stingur út í kortið, hvussu vit í øllum virksemi taka atlit at umhvørvinum soleiðis, at komandi ættarlið hava somu møguleikar at gagnnýta náttúruna og tess tilfeingi eins og undanfarin ættarlið. Til ber at lesa samtykta umhvørvispolitikkin HER.
Nú verður arbeitt víðari við at gera ein faldara til umhvørvispolitikkin. Hesin faldari kemur á torshavn.fo í næstum."
Vit sum brenna fyri umhvørvinum vita, at tað eru nógvar avbjóðingar á økinum - hugburðsbroyting er eitt, tora at seta umhvørviskrøv er eitt annað.
Eg havi sett mær 6 mál, at arbeiða ímóti fram til 2020.
MÍNI MÁL:
- bussleiðin koyrir alla dagar, tí at koyra saman er grønari
- er kommunan væl við og helst førandi á umhvørvisøkinum
- vit hava fjølbroytta grøna vinnu, sum kastar ferfalda í samfelagið
- vit skilja lívrunnið affall, og eru sjálvforsýnandi í mold og tøðum
- vit endurnýta meira affall
- kommunan koyrir elbil, tá tað ber til
Eg vil fremja umhvørvispolitikkin út í verkið.
Veljið tí eina sterka grøna kvinnu í býráðið 8.november.
Bjørg Dam
Valevni Javnaðarfloksins til kommunuvalið í Tórshavnar Kommunu.